Hebrews 4
1kentááyávéna Áánútu séna kesópaꞋa taagándanaaowe simái tarúmakain-aimba kwáyáimba póꞋa keinárawapinkemba évakarawai séꞋa kwenópaꞋa kwéꞋa kwesé koagándanaumne-kanaa matukéꞋa arávasuwaiyavainivo kárákwimai kaweꞋá oró. 2Áánútuna kawer-áímbó ísaraundantemba ááéma kentáá síkwáꞋnáma ísaraambanivo úwoi tááre suꞋmai isésa íma áraire sésa tirumpimbá tátorowana póna mináínkó íma túwaꞋnaa uráiye. mindáyaveꞋa keinárawapinkemba évakarawai séꞋa ÁánútunopaꞋa kwéꞋa kwesé koagándanaumne-kanaa matukéꞋa arávasuwaiyavainivo kárákwimai kaweꞋá oró. 3naaóváꞋá Áánútu kwíyóne marawé tarórumai ánásena agándarain-kanaa kwáyáimbanivo kwenááiyavesa íma áraire sésa kwenkáꞋá agevamái méraawaiyavena séna- áwááꞋo tiyúnda asiramái séꞋa kesópaꞋa
- íma tésa kesé taagándanaaowe
- Áánútu avaꞋmoraé-kanaa mayáí maimái
- ánásasuwena avakaeté-kanaa agándaraiye
- kesópaꞋa íma tésa kesé taagándanaaowe
- ívéꞋa Áánútumo kwésimatimin-aimba ísáaro.
- tirumbó makáanteniꞋa íma éꞋa kwenáái ísáaro
8naaóváꞋá moóráwai áwíꞋa Yósúwa tíꞋmaena kawer-áyámpáꞋá mátinkomba mináyámpáꞋó ÁánútumpaꞋo agándai-ayampaꞋo kwáyonkakai naaémba Áánútu íma moórá-kanaama maréna séna agándanaaon-kanaa tíníye íma siráisino. 9Áánútu kwená mayáí ánásasuwena agándai-kanaa makáimba pósa kwená kwaási agándaan-kanaa kwáyáiye. 10Áánútumo kwená mayáímó ánásasuwenamo agándaraintemba ÁánútunopaꞋa kwésa kwesé agándaawaima miwígwáráꞋá mayáí ánásasuwesa agándanaaowe. 11mindáyaveta ÁánútunopaꞋa kwéta kwesé agándanaundayaveta siyáántámba kwimáíya mayáíyá kwémayaundaya miráyá onó. kentáá síkwáꞋnáma uráantemba mirá-sáwíꞋá únavaiyaanivo kwenáái ísámai kaweꞋá éta kárákwimai kawer-íyataao.
12Áánútu máyáiwai isaná kwenááigo mayáí kwémayaiye. évarevar-ayampaꞋa áwáima táíꞋmatan-tusuwaaineimo póímo kárámaimo túwínkaaꞋo ontembá Áánútun-aaigo kentáásirumpinken-imayaa sáwí-imayaawe kawer-ímáyááwé taaímbaraisata kwéawanaumne. sirááímo tain-tántááré kwésunanaya Áánútun-aaigo taaímbaraisata sáwí-yantaare kawe-tántááré kwéawanaumne. 13kwíyómpare marapáré amápa-tantaaꞋa Áánútu aúrankaꞋa íma kwéauyoraivo kwíyómpare marapáré amápa-tantaaꞋa avoraꞋá kwáyáísana kwéawanaiye. kwemá mirá iwáí póna kesáá máyaundawaina ááinta sísaa ínata simámenaundayaaniye. Áánútun-aai aúváí-kwandaaivimba súnda-aimba mirán-áímbá kwáyáintaveta kentáá síkwáꞋnámo uráantemba mirá-sáwíꞋá únavaiyaanivo kwenáái ísámai kaweꞋá éta kárákwimai kawer-íyataao.
Ísuma aivaꞋ-mónó-káwáánáꞋán-iye kwaasái.
14Ísu Áánútu ááninko kentáásí anóndako éna aivaꞋ-mónó-káwáánákó póna kwíyómpaꞋa Áánútuwe uména kentáá súwaꞋnaa enaya kwéaisaa-imba póta kwenááiyaveta áraire siráundayaveta ívéta mináímbá asiramáíya tátoraano. 15kentáásí aivaꞋ-mónó-káwáánákó marapáꞋá máyonkaꞋa amápa-tantaatavesa sáwí-aimbo sínda isánáe sésa áísaa úmaesa kwéiyumbanivo íma sáwíꞋa uráimba póna kentááyávésamo sáwí-aimbo síyambo isánáe sésamo ombá kentáávímbá íma asirayámbá kwáyáísana kwemá suwánénaya aruntá kwéumasinkaiye. 16mindáyavena kentáávímbá umbai-yántááꞋá kwáyaindaraꞋa íma sáátaveta kwéonanaya Áánútu úwoi kwésuwaꞋnaa-iwainopaꞋa konanayá aruntá umásinkenaya úwoiya súwaꞋnaa íníye.
Copyright information for
KZE